Како да направите онлајн продавница?

Онлајн продавницата не е само сајт со кошничка. Тоа е начин на продажба што продолжува и откако клиентот ќе кликне „Нарачај“: пакување, достава, наплата, враќања. Добро подготвена продавница го прави тоа лесно и за вас и за клиентот.

Еве седум чекори, по редот по кој ги поминуваме и ние.

1. Одлучете што продавате и на кого

Почнете со производите што најдобро се продаваат и што најлесно се праќаат. Не мора да ставите сè од првиот ден. Продавница со 30 добро опишани производи е подобра од продавница со 500 производи без фотографии.

Размислете кој е вашиот купувач: дали купува од телефон, дали му е важна брзата достава, дали бара големо или мало пакување.

2. Подгответе ги производите

За секој производ ви треба:

• Име, онака како што го бараат клиентите.
• Фотографии, светли и јасни, по можност од неколку агли.
• Опис: што е, од што е направено, димензии, количина, како се користи.
• Цена и, ако имате варијанти, бои и големини.
• Категорија, за да може да се пребарува и филтрира.

Ова е делот што трае најдолго, и најмногу влијае на продажбата. Почнете навреме.

3. Цени и достава

Одлучете колку чини доставата и кој ја плаќа. Најчести решенија:

• фиксна цена на доставата за цела Македонија;
• бесплатна достава над одреден износ;
• подигнување во продавница, ако имате локал.

Договорете се со курирска служба пред отворањето. Прашајте за цени, рокови, враќање на пратки и наплата при достава.

4. Плаќање

Во Македонија многу купувачи сè уште сакаат да платат при достава. Тоа е најлесно за почеток, бидејќи не бара договор со банка.

Плаќањето со картичка бара договор со банка или со провајдер за онлајн плаќање и нивна проверка на продавницата. Почнете го тој разговор рано, бидејќи може да потрае. Многу продавници почнуваат со плаќање при достава, а картичките ги додаваат подоцна.

5. Правила и законски обврски

Секоја онлајн продавница треба да има јасно напишани:

• услови за купување: цени, достава, рокови;
• враќање и рекламации: како клиентот враќа производ и кога ги добива парите назад;
• политика за приватност: кои податоци ги собирате и зошто.

Продажбата на далечина има свои обврски кон потрошувачите, на пример правото на враќање. Проверете ги со вашиот сметководител или правник пред отворањето, за текстовите да одговараат на законот и на начинот на кој работите.

6. Нарачките и залихата

Кога ќе стигне нарачката, треба да знаете:

• дали производот го имате на залиха;
• кој го пакува и кога заминува;
• како клиентот дознава дека пратката е на пат.

Добрата продавница ве известува за секоја нова нарачка, му праќа потврда на клиентот и ја намалува залихата сама. Кога продажбата ќе порасне, магацинот и продавницата може да се поврзат, за да не ја броите залихата рачно.

7. Луѓето да ја најдат

Отворањето е почеток. Купувачите ќе дојдат од Google, од социјалните мрежи и од вашите постојани клиенти. Објавете ја продавницата на профилите што веќе ги имате, ставете ја адресата на сметките и кесите, и средете го Google профилот ако имате локал.

Што нудиме ние

Нашиот пакет Продавница е онлајн продавница со домен, хостинг и одржување во една цена: каталог со категории и пребарување, кошничка, нарачка без регистрација, пресметка на достава, плаќање при достава, а со картичка по договор со банка, и админ-панел за производите и нарачките. Цената е по понуда, според бројот на производи и функциите.

Пробајте го демо-сајтот на страницата Пакети, па пишете ни што продавате.